Photo - KSNG |
(ကေအဲန်ယူ)ကရင်အမျိုးသားအစည်းအရုံး ထိန်းချုပ်နယ်မြေ တောင်ငူခရိုင် တပ်မဟာ (၂)အတွင်းရှိ IDP ပြည်တွင်း စစ်ပြေးဒုက္ခသည်များအတွက် ဂျပန်နိုင်ငံရှိ နီပွန်ဖောင်ဒေးရှင်း (NIPPON Foundation)မှ လူသားချင်း စာနာမှုဆိုင်ရာ ထောက်ပံ့ရေးအဖွဲ့မှ ဆန်အိတ် ၂,၄၀၀ အိတ်လှူဒါန်းခဲ့သည်။
ယင်း ဆန်အိတ်များကို ပြီးခဲ့သည့် မေလ ၁၈ ရက်နေ့ နံနက် ၁၀ နာရီအချိန်တွင် တောင်ငူမြို့ရှိ ဘုရင့်နောင်ခန်းမဆောင်တွင် ကေအဲန်ယူ တပ်မဟာ (၂)ထံသို့ လွှဲပြောင်းပေးအပ်ခြင်း အခမ်းအနား ကျင်းပပြုလုပ်ခဲ့သည်။
ထိုဆန်အိတ်များအား ကိုယ်တိုင် လက်ခံခဲ့သူ တောင်ငူခရိုင်ဥက္ကဌ ပဒိုစောအယ်ဝါးက “ ဒီဆန်တွေကို ပထမဦးစားပေးအနေနဲ့ကတော့ ကျနော်တို့ ဒေသမှာ စစ်ဘေးကြောင့် စားဖို့သောက်ဖို့ တကယ်မရှိတော့တဲ့ သူတွေကို ပထမ ဦးစားပေး အနေနဲ့ ဝေပေးသွားဖို့ရှိတယ်”ဟု ပြောသည်။
ကေအဲန်ယူ ထိန်းချုပ်ရာနယ်မြေအတွင်းရှိ ပြည်တွင်းစစ်ပြေး ဒုက္ခသည် ရွာပေါင်း ၁၀၀ ခန့်ကို ပေးဝေသွား မှာဖြစ်ပြီး လူသားချင်း စာနာထောက်ထားသည့် အနေဖြင့် ယခုလို လာရောက်လှူဒါန်းသည့်အပေါ် အထူးပင် ၀မ်းမြောက်ကြောင်း ပဒိုစောအယ်ဝါးက ဆက်ပြောသည်။
၎င်းက“ကျနော့်အနေနဲ့တော့ နီပွန်ဖေါင်ဒေးရှင်းဟာ ပြည်သူတွေ တကယ်လိုအပ်နေတဲ့အရာတွေကို ကူညီထောက်ပံပေးနေတဲ့ အဖွဲ့အစည်းတခုဖြစ်ပြီး ရှေ့ဆက်ပြုလုပ်သွားမဲ့ အစိုးရနဲ့ ကေအဲန်ယူကြား ကငြိမ်းချမ်းရေးအတွက်လည်း အများကြီးအထောက်အကူ ပြုနိုင်လိမ့်မယ် လို့ထင်တယ် ”ဟု ပြောသည်။
ဆန်အိတ် လွှဲပြောင်းပေးအပ်ပွဲ အခမ်းအနားသို့ ကေအဲန်ယူ ဗဟိုမှ နိုင်ငံခြားရေးဝန်ကြီး ပဒိုစောအောင်ဝင်းရွှေ ၊တောင်ငူခရိုင်ဥက္ကဌ ပဒိုစောအယ်ဝါး၊ တွဲဖက်အတွင်းရေးမှူး ပဒိုစောသောတူထူး တက်ရောက်ပြီး အစိုးရဖက်မှ ပဲခူးတိုင်းဒေသကြီး အစိုးရအဖွဲ့၊ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး သက်ထွန်းတို့ တက်ရောက် သကဲ့သို့ နီပွန်ဖေါင်ဒေးရှင်းမှ မြန်မာနိုင်ငံတာဝန်ခံ ဦးမဲန်းမူရာ (Umemura)နှင့် ဘာသာရေးခေါင်း ဆောင်များအပါအ၀င် စုစုပေါင်း ၄၀ခန့်တက်ရောက်ခဲ့သည်။
ပြီးခဲ့သည့် ဖေဖော်ဝါရီလ ၁၂ ရက်နေ့တွင်လည်း နီပွန်ဖေါင်ဒေးရှင်းမှ ကရင်ပြည်နယ် ဖားအံခရိုင် အတွင်းရှိ ပြည်တွင်းစစ်ပြေး ဒုက္ခသည်များအတွက် ဆန်အိတ်ပေါင်း ၂,၄၀၀ ကျော် သွားရောက် လှူဒါန်းခဲ့သေးသည်။
No comments:
Post a Comment